Këngë për meshkujt “Fancy”

Jo vetëm që e quajnë Linda Zanzi, por këtë emër ajo e përdor kudo që prezantohet. Dhe vërtet është “zanzi”. E bukur dhe sharmante, këngëtarja Linda ka mbi tre vjet që ka hyrë në tregun muzikor, por sukseset e saj vijojnë njëri pas tjetrit.

Deri më tash ajo ka realizuar katër këngë. Këngën “Ke gabuar” e kishte interpretuar në spektaklin “Miss Kosova Universe 2009”, ndërsa në po të njëjtin vit në festivalin “Poli Fest 2009” u shpërblye me çmimin për kompozimin më të mirë.

Pa i shijuar ende sukseset e lartë cekura, Linda sjell para simpatizuese të saj këngën e re të realizuar më videoklip, i cili është edhe i pari në karrierën e saj muzikore. “Kënga është e punuar gjatë verës por për shkak të disa angazhimeve të tjera nuk kam mundur ta publikoj deri tash.

Kënga titullohet “Fancy” e cila është me tekst dhe kompozim të Sajmir Dërgutit nga Shkupi”, u shpreh Linda për “Zërin” të mërkurën në mbrëmje kur promovoi edhe këtë këngë në café bar “Contra” në Prishtinë. Sipas saj, tema e këngës iu kushtohet djemve “Fancy” të cilët depilohen heqin vetullat, mirëpo edhe pse ajo e këndon këtë këngë, personalisht nuk i pengojnë këto gjëra të meshkujve. “Unë nuk jam kundër meshkujve që depilohen, përkundrazi mua më pëlqejnë ata meshkuj, më pëlqejnë kur ata bëjnë ushtrime dhe ndërtojnë trupin e tyre, por jo edhe ata që kalojnë në ekstreme dhe nuk dallojnë nga femrat.

Mua më ka pëlqyer ky tekst dhe kam pas dëshirë që ta këndoj”, deklaron vajza “zanzi”. Videoklipi është realizuar nga produksioni “5 Stars” me producentin dhe fotografin Arbër Hoxha, ndërsa pjesë e këtij videoklipi është edhe Lisi Hoxha pjesëmarrës në “Miss & Mister Kosova 2010”.

Ndonëse është dimër dhe bora po mbretëron në vendin tonë, videoklipi sjell disa skena të “nxehta” të cilat i pranon edhe vetë Linda. “Videoklipi është paksa i ‘nxehtë’ por meqë edhe kënga ishte e tillë atëherë u dashtë që të ia përshtatim këngës”, bën më dije ajo.

Edhe me dy këngë të reja

Këngëtarja Linda nuk do të ndalët më kaq. Ajo ka filluar punën edhe për projekte të reja të cilat priten të dalin në fillim të vitit që po hymë.

“Jam duke i përgatitur edhe dy këngë të reja. Njërën jam duke e punuar të Riza Dulaku më të cilin kam bashkëpunuar edhe në këngën “Një muaj” dhe në atë tjetrën, ndërsa kënga e dytë do të punohet nga Afrim Macula – produksioni “Yjet”.

Këto do të shfaqen pas Vitit të Ri, ndërsa në muajin mars do të prezantohem edhe më videoklipin e ri”, ka thënë ajo. Linda bëri më dije se ka marr ftesa të shumta për të kënduar në DVD për Vitin e Ri si dhe do të jetë prezent në shumicën e televizioneve tona nacionale dhe lokale.