Metamorfoza e radhës për Ana Oxa

Vizitor

"Unë jam fundi i atij që kërkon tokën/ jam fundi i atij që më prek/ unë jam e shëmtuara dhe e bukura/ unë jam vetë gjyqi im në çdo hap". Kur Ana Oxa në vitin 2006, para publikut të Sanremos këndoi këngën e saj "Gjyq vetes" e shkruar nga Pasquale Panella e shoqëruar nga një grup polifonik shqiptar e instrumente etnikë, ndryshimi kishte nisur.

Ndoshta, kur lindi në Bari nga një nënë italiane e një baba shqiptar, që kishte të njëjtin mbiemër si diktatori, Enver Hoxha, diçka ndryshe u ngjiz në të. E pikërisht mbi të qenit ndryshe, ajo “e shëmtuara dhe e bukura”, fituese e dy festivaleve të Sanremos, ndërtoi 30 vjet karrierë.

Janë 30 vite suksese, të gjitha në një zë. Të enjten mbrëma përballë publikut milanez, ajo ofroi performancën e radhës, në bazilikatën e Shën Markut. Një koncert live, të titulluar “Në zemrën e zërit”, i cili mbyll festivalin “Muzika qiellore”.

Sipas “Il Giornale”, ajo këndoi e shoqëruar nga formacioni prej 16 këngëtarësh, “Senza tempo”, pa shoqërim instrumental dhe me një repertor që niste me muzikën etnike, për të vazhduar tek ajo klasike e Peter Gabriel (“In your Eyes”) a Dulce Pontes (“Ondeia”), etj.

Një nga metamorfozat e radhës së këngëtares, e cila i është paraqitur publikut në sa e sa pamje, që nga stili punk, tek ai pop, engjëllor, apo djallëzor. Dhe në fakt, pas eliminimit në finalen e Sanremos të 3 viteve më parë, ajo do të tërhiqej nga daljet e saj publike, nga fansat e shtypi. /panorama/